Hér er upptaka frá nóvemberfundinum.

Örn sagði frá Þýskalandsferð nokkura félaga. Önnur ferð er á dagskrá á næsta ári og voru 2 sæti laus þegar kynning fór fram.

Júlíana fór yfir hárkollustandaverkefnið, en þátttaka hefur verið mjög góð og hafa á fjórða tug standa verið renndir. Frábært framtak og fá félagar bestu þakkir fyrir góða þátttöku.

Af þeim sem skiluðu inn stöndum á fundinum eru hér flestir saman komnir á mynd:

Hér eru svo þeir félagar sem skiluðu inn stöndum 25. október, þegar fundur féll niður með stuttum fyrirvara:

Bjarni fræddi okkur um bit og brýnslu verkfæra, með einföldum áhöldum eins og sandpappír, stáli, leðri og póleringarpúða í rennibekk.

Næsti fundur verður 31. janúar 2026.

Þá er loksins komið að næsta fundi, laugardaginn 29. nóvember n.k. kl. 10 árdegis.
Fundurinn verður haldinn í trésmíðadeild Fjölbrautaskólans í Breiðholti (við Hraunberg).
Minni á að framkvæmdir standa yfir við trésmíðadeildina og félagar gætu þurft að nýta önnur bílastæði í nærumhverfinu.

Örn segir frá Þýskalandsferð og Bjarni ætlar að fræða okkur um brýnslu án véla.

Við tökum upp þráðinn á góðgerðarverkefninu sem Júlíana kynnti á septemberfundi. Skorað var á félagsmenn að renna hárkollustanda og mæta með á októberfund.
Þar sem fundarstaður reyndist óaðgengilegur á síðustu stundu vonum við að félagar hafi tök á að koma með standana núna á laugardaginn.
Nokkrir félagar sáu ekki tilkynningu um frestun okt.fundar (skiljanlega) og mættu á staðinn með rennda standa.
Ég safnaði þeim stöndum saman og fór ásamt Júlíönu með þá í Krabbameinsfélagið þann 28. október. Viðtökurnar voru mjög góðar og tókum við fram að fleiri standar væru væntanlegir.
Vonandi sjáum við skemmtilegt úrval af stöndum!

Munið að allt áhugafólk um trérennsli er velkomið svo takið endilega með ykkur gesti og/eða látið aðra vita af fundinum.
Kaffi, spjall og góður félagsskapur að vanda.

Þetta er síðasti fundur ársins, svo komið endilega með eitthvað jólalegt af rennibekknum!

Við stefnum að því að taka myndir af félögum í lok fundar, til að setja í félagaskrá.

Hér er upptaka frá septemberfundinum (fundur byrjar á 14:00).

Á þessum fyrsta fundi vetrarstarfsins fór Andri yfir algengustu rennijárnin, hlutverk þeirra og notkun. Þessar upplýsingar/upprifjun á járnunum var meðal þess sem óskað var eftir að yrði tekið fyrir á fundi, þegar könnun var send síðasta vor.
Einnig var mikið beðið um brýnslu, sem verður tekin fyrir á októberfundi.

Júlíana kynnti góðgerðarverkefni, að félagar renni hárkollustanda sem verða svo afhentir Krabbameinsfélaginu. Júlíana sýndi dæmi um útfærslur, ásamt upplýsingum um stærðir og form standanna. Þessar upplýsingar er hægt að sjá á upptökunni hér fyrir ofan, hennar kynning byrjar á 1:26:20.

Júlíana skoraði á félaga að renna stand/a og koma með á októberfund. Ef félagar vilja af einhverjum ástæðum ekki gefa sína standa áfram til Krabbameinsfélagsins, þá er það í góðu lagi. Skorum samt á sem flesta að taka þátt og mæta með stand/a á októberfund!
Júlíana safnar stöndunum saman í lok fundar og afhendir Krabbameinsfélaginu.
Ef þátttaka verður góð er jafnvel hægt að gera þetta að árlegu verkefni.
Félagar geta haft samband ef spurningar vakna: julianaomars@gmail.com

Hér er skjal með ýmsum upplýsingum um sambærilegt verkefni:
https://www.woodturner.org/common/Uploaded%20files/WIT/Liaison/Wigstand%20Collated%20articles.pdf

Hér er meistarinn Richard Raffan að sýna hvernig hann rennir hárkollustand:

Fyrsti fundur vetrarins verður haldinn í trésmíðadeild Fjölbrautaskólans í Breiðholti (við Hraunberg) laugardaginn 27. september kl. 10 árdegis.
Athugið að framkvæmdir standa yfir við trésmíðadeildina. Félagar gætu þurft að nýta önnur bílastæði í nærumhverfinu.

Andri mun standa við rennibekkinn og Júlíana kynnir áhugavert rennt góðgerðarverkefni.

Fjölmennum á þennan fyrsta fund tímabilsins 2025-26 og takið endilega með það sem hefur komið af rennibekknum undanfarið.

Munið að allt áhugafólk um trérennsli er velkomið svo takið endilega með ykkur gesti og/eða látið aðra vita af fundinum.
Kaffi, spjall og góður félagsskapur að vanda.

FERÐAKLÚBBUR TRÉRENNISMIÐA undirbýr nú sumarferð 2025.
Við endurtökum heimsókn til skógarbænda, áfangastaður er Hrífunes.
Þar er umhverfið einstaklega fallegt og vert að skoða.  Skógarbóndinn og samstarfsmenn hans eru í Giljalandi.  
Tjaldstæðið er við félagsheimilið Tungusel.  Frjálst er að taka með sér gesti.
Ferðin verður frá þriðjudegi 1. júlí til fimmtudags 3. júlí.
Mæting er á tjaldstæðinu við Tungusel.  Kostnaður er hver nótt 2000 kr og möguleiki á rafmagni fyrir 1000 kr á dag.
Hugmyndin er að hafa sameiginlega grillmáltíð þar sem hver kemur með sitt hráefni (rétt eins og fyrir aðrar máltíðir).
Það verður rennibekkur og járn í för (getið líka komið með ykkar eigin járn með ykkur) , gaman væri að menn og konur hefðu einhvert trérennsli með sér.

"Höfum gaman saman" er einkunnarorð ferðaklúbbsins.
Þátttökuskráning:
Antonía S 691-3201
Karl Helgi  897-2280

Eiðistorgi 15, í húsnæði Handverks og hönnunar.

Opnun sýningarinnar 30 (þrjátíu) fer fram í rými Handverks og hönnunar að Eiðistorgi 15 þann 23. apríl kl 14-19.
Sýningin mun svo standa til og með 30. apríl.
24. apríl (Sumardagurinn fyrsti): kl. 14-17
25.-30. apríl: kl. 14-18

Vinnustofan er í beinni á YouTube rás Handverks og hönnunar.
Hér er hlekkur á rásina: Handverk og hönnun - YouTube

Þegar útsending er í gangi, er rauður hringur og 'LIVE' merki sýnilegt, smellið á merkið til að horfa. (Sjá mynd).
Þegar útsendingu lýkur ættu myndböndin að birtast á rásinni, hvert af öðrum.

Aðalfundur Félags trérennismiða á Íslandi verður haldinn í trésmíðadeild Fjölbrautaskólans í Breiðholti laugardaginn 29. mars kl. 10 árdegis.
Dagskrá:
Venjuleg aðalfundarstörf samkvæmt lögum félagsins.

• 1. Skýrsla stjórnar
• 2. Lagðir fram endurskoðaðir reikningar
• 3. Lagabreytingar ef einhverjar eru
• 4. Kosning stjórnar og nefnda
• 5. Ákvörðun félagsgjalda
• 6. Fundargerð lesin og borin undir atkvæði

Formanni hafa ekki borist neinar tilkynningar um framboð til stjórnar né tilllögur að lagabreytingum.
Fræðsla í boði Bjarna.
Kaffi og spjall.

Í tilefni af 30 ára afmæli félagsins mun félagið taka yfir sýningarrými Handverks og hönnunar á Eiðistorgi, í 30 daga, allan aprílmánuð. Við byrjum á því að breyta rýminu í vinnustofu, með þeim tækjum og búnaði sem þarf til trérennismíða. 
Rennibekkur félagsins verður miðjupunktur vinnustofunnar og fyrri hluti aprílmánaðar fer í að renna! Félagar munu þá mæta hver á eftir öðrum og renna ný verk. 
Um miðjan apríl verður vinnustofunni breytt í sýningarrými. Sýningin stendur út aprílmánuð og afrakstur vinnustofunnar verður til sýnis (og sölu, ef áhugi er fyrir því).

Vinnustofan verður í 15 daga og verður hverjum degi líklega skipt í tvær vinnulotur. Á vinnustofunni verður einn rennibekkur og gert er ráð fyrir að ein/n vinni í einu. Það er þó leyfilegt að skrá sig í pörum, að 2 félagar deili vinnulotu og vinni til skiptis. Fyrir félaga sem eru áhugasamir en reynsluminni (eða vilja nýta tækifærið og fá góð ráð) verður hægt að óska eftir að hafa reynslumeiri félaga (mentor) á staðnum. Því væri gott ef reynslumeiri félagar myndu skrá sig á lista sem mentor, hvort sem þeir séu líka skráðir á vinnustofu eða ekki. 
Vinnustofan verður nokkurs konar innsetning í sýningarrými H&H og verður því eflaust áhugavert fyrir fólk sem á leið hjá að líta inn um gluggann og sjá vinnuna á bakvið handverkið. Vinnustofan sjálf verður þó ekki opin gestum og gangandi, svo félagar munu geta rennt í friði og þurfa ekki að vera í gestgjafahlutverki.
Þátttakendur komi sjálfir með rennijárn og það hráefni sem þarf en félagið gæti líka aðstoðað með þessa hluti ef þarf. 
Stefnt er að því að hafa á staðnum, fyrir utan rennibekkinn: bandsög, brýnsluaðstöðu, persónuhlífar, sandpappír, borvél, einhver rennijárn, eitthvað úrval af hráefni, lofthreinsikassi, spónsuga, ryksuga og minni verkfæri (skrúfjárn/bitar, skrúfur, reglustikur, rennimælir, blýantar, bréf...)

Skipulagið er í grófum dráttum svona:
24. – 31. mars: Uppsetning á vinnustofu
Vinnustofa standsett. Vélum, verkfærum, brýnsluaðstöðu, hillum, hráefni og öðru nauðsynlegu stillt upp.
1. – 15. apríl: Vinnustofa
Þátttakendum er raðað á þessa daga, líklega tvískipt (t.d. 10-14 og svo 14-18).
16. – 19. apríl: Tiltekt/uppsetning á sýningu
Tiltekt á vinnustofu og sýningarrými sett upp á sama stað.
22. – 30. apríl: Sýning
Sýning á afurðum vinnustofu.

Áhugasamir eru beðnir um að skrá sig með því að senda tölvupóst á andri.snaer.th@gmail.com 
Takið fram nafn, símanúmer og hvort óskað sé eftir:
*Að taka þátt í sýningu, með því að renna á vinnustofunni (látið vita ef óskað er eftir mentor á staðnum). Takið fram ef óskað er eftir ákveðinni dagsetningu eða tíma dags.
*Að vera skráð/ur sem mentor.
*Að aðstoða við uppsetningu á vinnustofu.
*Að aðstoða við að ganga frá vinnustofu, áður en sýning hefst.

Þetta verður skemmtilegur og eftirminnilegur viðburður og því vona ég að félagar taki vel í þessa auglýsingu.